Destinasyon: Bago sa aming paningin ni Jasmine Villanueva

Destinasyon: Bago sa aming paningin

ni Jasmine Villanueva

      Ang pinakapaboritong panahon ng mga estudyante na tulad ko ay ang tag-init. Ito ang panahon kung saan ikaw ay magpapahinga, kakain at walang dapat gawin na pang-akademiko, ngunit gawaing bahay lamang. Ang panahon narin ito ang naguudyok saming mga kabataan na makaranas ng masaya at di makakalimutan na lakad. Halimbawa na lamang ang pagpunta naming ng aking mga kaibigan sa isang dalampasigan. Maraming proseso ang pagpaplano sa isang lakad lalo na kung ikaw ang inaasahan na magpasimula ng plano at makipagusap sa lahat.

      Ang pagpaplano ng isang lakad ay parang pagguhit sa isang papel, kung ito ay hahaluan mo ng kulay ay maganda. Nagsisimula na kaming gumuhit ng bagong karanasan ang destinasyon namin ay sa Calatagan, Batangas. Ang byahe papunta roon ay 2 oras mula sa Cavite, umarkila kami ng sasakyan na gagamitin namin papunta. Pahirapan ang pag-arkila ng sasakyan dahil sa nakakabigat sa bulsa na presyo, ang tatlong araw at dalawang gabi ay katumbas ng pitong libo dahil malayo ang aming destinasyon at dagdag narin ng limang daan pang-kain ng drayber. Pito kaming magkakaibigan ang pupunta sa Batangas ng walang kasamang matanda kundi ang drayber lamang. Napakatapang naming sumabak palabas ng aming comfort zone, dahil kung noon sa mga fieldtrip na kasama ang aming mga magulang lamang kami nakakaranas na makapunta sa mgagandang lugar, ngunit ngayon kami nalang ang magkakasama. Habang bumabiyahe na kami papunta ng Batangas ay kinukulayan na naming ang iginuhit naming plano. Napaka ganda ng mga tanawin papunta sa Batangas, makikita ang matataas na puno na tinatakpan ang araw, mga taong nagbebenta ng mga prutas at makikitang malinis ang kapaligiran. At ito na nakarating na kami sa Calatagan, Batangas. Isang bahay ang tinuluyan namin, bago pumunta sa dalampasigan ay namili muna ng mga pagkain sa palengke. Napaka sariwa ng mga ibinebenta sa palengke alam mong bagong huli pa sa mga dagat at kung ang iba ay mga bagong pitas na prutas at gulay. Nagluto muna ng bangus at tilapia na may kasama pakwan at manga na napakatamis. Naglalakad na kami papunta sa dalampasigan na ang tawag ay Burot beach, may bayad na singkwenta pesos. It’s more fun in the Philippines ika nga, napaka ganda sa Burot beach, makikita ang tirik na araw na hahalik sa katawan, ang mga alon na yayakap samin at puting buhangin na aming hihigaan. Asul na asul ang tubig talaga ngang magagayak kang lumangoy agad kasama ng ibang mga naliligo. Habang nakababad sa tirik ng araw at maalat na tubig wala kang maririnig na busina ng mga sasakyan, walang masangsang na amoy at walang maitim na usok. Matapos lumangoy at sumakay sa isang Bangka, nagbayad ng isang daang piso ang destinasyon ay sa isang sand bar. Habang nakasakay sa Bangka ay lalong yumayakap ang alon, lumalayo sa maraming tao at makakasulyap na naman ng bago sa aming mga mata. Sa sand bar para kaming nasa gitna ng dagat, napakalinaw ng tubig makikita ang mga starfish at ilang mga isda. Kumukuha kami ng maraming litrato upang may alaala kaming iuwi. Matapos makarating ng sand bar at bumalik sa malapit sa dagat ay palubog na ang araw. Napaka ganda ng langit! Pinagsama-sama ang kulay kahel, dilaw, lila at rosas ngayon na lamang namin naranasan na makitang lumubog ang araw na tila ba hawak kamay mo na at parang nasa paraiso. Pagsapit ng gabi ay nagsindi na ang mga apoy at bumuo ng kanya kanyang bilog. Habang lumalalim ang gabi, lumalalim din ang kwentuhan. Matapos na ang ilang araw ay pauwi na ulit kami sa Cavite.

      Talaga nga namang napaka yaman ng Pilipinas sa magagandang lugar. Ang realisasyon naming sa aming napuntahan ay kami ay maswerte dahil sa aming edad ay nakarating na kami sa ganoong kalayo na lugar. Sa una ay akala namin ay hindi matutuloy ngunit dahil sa kagustuhan namin na makakita ng bago sa ming paningin ay nagkaroon na kami ng inaasam na bagong karansan. Maari na kaming mga kabataan ay mapusok pero kasama rin ito sa proseso ng aming buhay at hindi lamang kami umaalis dahil gusto namin kundi makabuluhan din ang basihan namin. Ito rin ay pagpapakita namin na ipinagmamalaki at niyayakap namin ang mga lugar at kultura dito sa Pilipinas. “Kabataan ang pag-asa ng Bayan” ika nga, kaming mga kabataan ay maari rin magsilbing magandang ihemplo sa ibang tao dahil ang mga karansan namin ay binubukas ang aming isipan sa pagharap sa mundo, mas naipapahayag na namin ang aming nararamdaman na pwede naming ibahagi upang makapag-ambag ng kaalaman sa iba.