Earphones ni Christine Gueco

Earphones

ni Christine Gueco

Pagharap ko sa salamin ay nakita ko ang pagod na mukha, maitim at napakalaking eyebags at payat na pisngi. Anong oras na at hindi pa rin ako natutulog. Namumula na ang mata at tila hapong hapo ang mga ito. Nakakaawa at napasabi nalang sa sarili na, "Puyat na naman ako."

"Kring! Kring-g-g-g-g!" Kring!" Tumunog na naman ang alarm. Hudyat na oras na para maligo, patuyuin ang buhok at unatin ito gamit ang plantsa para confidently beautiful pagpasok sa eskwelahan. Patuloy ang paglagas ng buhok ko sa sahig pero syempre bago umalis ay kailangan ko walisan ang mga nalagas na buhok na nalaglag sa sahig. Pagkatapos magwalis ay pupunasan ang mukha sapagkat pawis na pawis. Dali dali akong lalabas at tatakbo dahil pagkatingin ko sa orasan ay 6:30am na at ako'y tatanghaliin na sa alas siyete kong klase. Pero hindi ako papayag na aalis akong wala ang aking starter pack. Starter pack ba kamo? iPhone 6s, Spotify Premium saka samahan na rin ng earphones. Siguradong pangmatindihan iyan. Nako po, yari na naman ako sa professor ko.

Eto na, nakikita ko nang paparating ang fx. Puno ang karamihan ng fx ngunit may dumating na isang fx na isa na lamang ang kulang. Pinatulan ko na kahit nakita kong siksikan. Okay lang kahit isiksik ko na ang sarili ko basta makapasok lang at umabot sa 7am na klase. "Bayad po, sa UST po yan kuya." wika ko. Matapos magbayad ay agad kong isinaksak ang earphones sa aking cellular phone. Namili ng magandang tugtugan, scroll down para makita ang aking playlist na ginawa. Sa wakas ay nakapili na rin ng kanta. Hirap na hirap ako sapagkat sira ang aircon, siksikan at sumasakit na ang likod at pwet ko dahil hindi ako nakasandal at kalahati lang ang aking nauupuan. Pero walang akong nagawa at nakatulog pa rin ako habang nasa byahe. Tuloy ang tugtog habang nasa byahe. Naging matagal ang byahe dahil sa matinding daloy ng trapiko sa Quezon Avenue at samahan na rin ng sugapang traffic lights sa España. Matapos ang matagal tagal na byahe ay nakarating na rin sa ako UST. Tinanggal ko ang earphones at narinig ko ang tugtog na hindi maganda sa pandinig. Tugtog na para bang hindi natatapos at walang kaayusan. "Hay. Ang sakit sa tenga." winika ko.

Isang araw na naman ang lalagiin ko sa eskwelahan. Umaga palang ay tila pang hapon na ang awra ko. Nawala na ang pagkaunat ng buhok at hulas na hulas na pumapasok sa silid-aralan. Walang gana, walang maintindihan sa mga tinatalakay, pinipilit matutunan ang mga konseptong ibinase sa curriculum ng ibang bansa. Araw-araw ay hinihintay ko at ng aking mga kaklase ang uwian. Ganito palagi ang nangyayari. Walang bago. Paglabas ng ust, mag-aabang na naman ng fx. Isasaksak muli ang earphones sa cellular phone. Ngunit sa pagsaksak ko ng earphones ay may kapayapaan. Napipili ko ang tunog na nais kong marinig. Yung tugtog na hindi masakit sa tenga at yung tugtog na maganda ang areglo. Banayad ang aking pakiramdam na parang walang problema. Nakangiti at humuhuni huni pa habang sinasabayan ang tugtog. Ang earphones na labis kong pinahahalagahan sapagkat sa oras na ilagay ko ito sa aking tenga ay masaya ang aking mood at may kalayaan ako na para bang walang kumokontrol sa akin. Hawak ko ang mga bagay bagay. Magandang tugtog at totoong sarili ko ang lumalabas sa tuwing gagamitin ko ang earphones ko. Ngunit nakakalungkot man isipin ay ang tugtog na kaaya-aya sa pandinig ko ay panandalian lamang. Sa aking pagbaba sa sinasakyang fx ay tatanggalin muli ang earphones at rinig na rinig ang nakakabahala, nakapanlulumo at umuugong na tunog ng kapaligiran na aking nilalakaran at ginagalawan.