Nanay

PICTORIAL ESSAY

“Nanay”

 

Habang nagsisilbing  Inhinyero ang Tatay ko, na nagpapatibay't naglalatag ng pundasyon. Mistulang Arkitekto naman si Nanay, ang nagpaplano at nagpapaganda ng gusaling kahit alam kong pangit at wasak ang panlabas na kaanyuan ay patuloy pa ring nagtitiis't pinapaniwalaang gaganda at maayos din ito. Patuloy niyang inaayos ang magulo nitong kaanyuan, ang madumi nitong mga pader, at ang basag na bintana. Palagi niyang nakikita ang karikitan ng gusali.

 

May mga araw na ako’y natatakot at mag isa, at siya’y pupunta at sasamahan ako upag matanggal ang aking kaba. Kapag may problema akong pinagdadaanan, handa siyang making at ang kanyang oras ay nilalaan. Ina, hindi ka lamang nagsilbing taga gabay, taga luto at taga saway. Ikaw ay isang naging matalik na kaibigan. Ilaw ng tahanan, ika’y laging nasa puso’t isipan.

 

 

Madalas, magulo at nakakapagod ang paglaki. Nakakahilo ang mga pasikot-sikot na mga pagsubok at nakakangalay ang bigat ng bukas. At tuwing nararamdaman ko na nawawala na ako, titignan ko  lang ang aking nanay at nakauwi na ako. Siya ang tanging pahinga sa kapaguran, ang katahimikan sa kaingayan. Ang aking therapist na mas magaling sa kahit sinong doktor.

 

Daig pa niya ang isang comedian dahil kahit ang pinakamalulungkot at madidilim na araw ay kaya niyang mapasaya. Ang iyak at sakit ay kaya niyang palitan ng ngiti at tawa.

 

Hinihiling na sa bawat paguwi ko ay nariyan ang kaisa-isang taong kailanmay hindi pumapalyang salubungin ako ng kaniyang mga ngiti.

 

Tinuruan niya kong sumulat, magbasa, lumakad, makipaghalubilo, makipagkaibigan, maging mabuting tao, at iba pa. Pero higit pa sa lahat, tinuruan niya kong maging anak ng Diyos katulad niya. Naging pundasyon niya ang pananampalataya sa kanyang pagmamahal at pag-aaruga. Wala na 'kong mahihiling pa.

 

Tinuruan niya akong magbilang –

Bilangin ang mga kasiyahan kaysa ang mga paghihirap

Tinuruan niya akong magbasa –

Basahin ang kinabukasan kaysa ang nakaraan

Tinuruan niya akong magsalita –

Sabihin ang “mahal kita”  kaysa magmura

Tinuruan niya akong magsulat

Isulat ang aking storya kaysa gayahin ang iba

Siya ang aking guro – ang ilaw ng aming tahanan

Almodovar, Ella Boiser, Abbygail Jasmine de Guzman, Kristen Jaye Escalante, Eleanor Tamboon, Jed Brian Tiglao, Gay Marie Oliver, Trizia Mari