Piano Keys ni Madine Montecastro

Piano Keys

ni Madine Montecastro

Bakit nga ba tayo nalulungkot? Bakit tayo nagkakaproblema? Sa dinami-raming eksena sa buhay, bakit may mga pagkakataong parang tayo ay minamalas?—Ito ay kadalasa’y iniisip ko noong ako ay bata pa lamang. Lumaking palangiti at magiliw ng chikiting, nakapagtataka para sa isang katulad ko ang mga ganitong eksena sa mundo.

Sa edad na labimpitong taong gulang, ang masayahing bata ay naging dalagang puno ng tensiyon. Natutunan kong ikimkim lahat ng galit at pagod; nang umapaw ito sa aking loob-looban, ako’y tuluyang dumepende sa sarili. Pano ba naman kasi, ang mundo ay puno ng kahirapan, korupsyon, kamalian sa sistemang pang-edukasyon, pagkalito sa kulturang pagkakakilanlan, at kung anu-ano pang bumabalibag sa ating mundo. Iba ang pakiramdam kapag lahat ng bagay ay lumalaban sa iyo.

Samantala, lumaki akong malapit at mapagmahal sa musika. Ako’y ipinasok ng aking magulang sa paaralang pang-musika. Natuto akong tumugtog ng piano, at kumanta nang maayos. Isang mahalaga at malalim na aral na aking natutunan at laging isinasapuso ay hindi lahat ng pagkakataon ay pinipindot natin ang mga puting piano keys; kailangan din ng mga itim (sharps at flats) upang maibunyag  ang tunay na kagandahan at kakayahan ng musika.

Lahat tayo ay nais maging masaya habang buhay. Ngunit, hindi sa lahat ng pagkakataon ay nangingibabaw ito. Kailangan din natin ng mga malulungkot na karanasan dahil ito ang magsisilbing mga aral natin sa buhay. Ito ang bumubuo sa atin para tayo ay maging mas matatag, kaya nating lampasan ang iba’t ibang hamon sa buhay. Kaugnay naman sa piano, ang mga itim at puting keys ay parehong kailangan sa musika. Bagamat ang tunog ng mga itim ay hindi kumpleto, kapag pinagsamahan mo ng mga buong nota (ang mga puti), maaaring makalas ang kapangyarihan at kahusayan sa musika.

Itong aral ang lagi kong isinasapuso. Naniniwala akong makakatulong ito sa lahat ng pagkakataon. Anumang hirap ang ipinagdadaanan, tandaan at pahalagahan din natin ang mga mabubuting pagkakataon. Kapag kaya nating panatilihin ang pag-iisip na ganito, makabubuo tayo ng makabagong “tayo”, at ito ang magdadala sa atin sa ating mga pangarap.